Article

Miten tunge a ni min tih? (Marka 8:27)

Samuel ralte

            Mahni kan inhriat dan leh midangin min hmuh dan hi a inan loh fo avangin, mahni kan inhriat dan ai chuan midang min hmuh dan hi a pawimawh zawk awm e. Ziaktu hmingthang Mark 'Twain-a thukhawchang " Bible-a thu har leh khirh pui pui te hian min ti buai lova, thu awl leh hriatthiam awlsam te te ka zawm theih si loh te hian min ti buai zawk a ni' a lo tih ang deuhin, Hnaivai te teah kan tih tur leh kan inenfiahna tur i han fawmkhawm dawn teh ang.

Midangte tana eng chhuak tura Pathianin a koh kei ni hi Kan thenawmte leh chhungkua a kan chenpute hian Kohhran hruaitu ni awm rëngin min hmu em? Kan nun dan, kan chetzia leh tawngkam te hi Kohhran Hmeichhe hruaitu ni awm rënga mawi a ni em? Kan tualzâl nun, kan incheina leh ngaihzawng kan neih dan chen hian KTP hruaitu, member-te entawn tlak kan ni em? Office hna thawk kan ni emaw, ram hna thawk leh inhlawhfa thin kan ni emaw kan thawhpuite leh kan chung a mi ten piangthar hmuhin min hmu em? Nge, midang aiin kan danglam chuanglo.

Kohhran leh khawtlanga inhmang tak ni chung siin kan hnathawhnaah kan kal tlai thin em, ban hun hmaa haw kan ching em? In hmang ve lem lote aiin enge kan danglamna. Hnathawhnaah KTP ve lo te aiin kan thawk tha zawk em?  Kan hnathawhna hmun theuhah kan thawhpui ten “Ani hi chu Kohhran / Hmeichhia / KTP hruaitu a nia a rinawmin a rinthlak ang” min ti thin nge midang ang thovin min en? Mahni theuh kan inenfiahna tur a van tam em!

Kan piantharna-te hi Biak In leh a chhehvelah chauh hian a tawp tur a ni lova, midang tana eng chhuak tur a ni dawn lawm ni? Office han dawr ve changa biak har leh induh deuh ho hi an Biak In-ah chuan an lam an lam duh khawp an tia, dik tak maw! 'Midang paw'n an ti ve tho a lawm' tih vang maiin thil tha lo leh dik lo hi sual a nihna a bo chuang lo. Midang chuan lo ti rawh se, nang erawh chu i piantharna kha heng hun a tan hian a ni dawn lawm ni. A tha zawnga midangte aia danglam ngamna hi a Pathian thu a, a 'Rau' em em bawk a ni.

            “He khawvel dan ang hian awm suh ula; Pathian duhzawng, a tha leh lawm tlak leh, that famkim chu in hriatfiah theih nan, in rilru athara awmin lo danglam zawk tawh rawh u.”

Rom 12:2