Thuchah

Thuchah         

           Thalai Pawl Member thar duhawm tak tak te, Tleirawl leh rawlthar khawvel atanga puitlin lam in panna kawngah he thuchah hian a puih che u beiseiin ka’n fuih ve ang che u.

Mibik i ni: I hmingpui zawng la i hmu ang, i hnampui zawng la i hmu teuh ang. mahse he khawvel hi vawi tam fang chhuak mah la nangmah ang midang i hmu ngai lovang. Pathianin ‘nangmah’ dang a siam lo. Anpui dang nei miah lova a bik liau liaua a siam, mi Special bik i ni. Mi bik i ni tih vanga hmai zangthal leh kut zungchal lek chunga midang hmusit leh hnuaichhiah lam a kawk lo. I hmaah hian sualna leh thlemna chi hrang hrang a la rawn inlar dawn, chûng alo thlen hunah chuan lo chapo khum ang che. thlemna hautak ber ber pawh paltlang ala ngai ang. 'Kei chu mi bik, Pathianin a bik taka a siam ka ni a, hetiang mai maia in hambuai tur ka ni ve lo' tih rilru pu chungin i lo uan khum thin dawn nia. Midang paw'n an ti tho alawm tih vangin sual hi sual a nihna a bo chuang lo. Midang chuan lo ti rawh se. Nang zawng eng thlemna pawh tawk la, mi bik i nihna kha chapo pui reng ang che.

I ti thei: I tawngtai tawh thin, I tawngtaina kha pathianin a chhang lo ni a hriat changte i nei thin em? Pathian chhanna i ngaithla fuh lo a ni zawk mai thei. Pathianin kan tawngtaina zawng zawng hi kawng thum-in a chhang vek.

1. Aw. 2. Aih. 3. Kha kha chu nangmah pawhin i ti ve thei, tum rawh.

Kan dilna tam zawk hi chu a pathumna hian min chhang. Pathianin fuke kimin a siam che a, chhia leh tha hriatna leh finnain a la thuam zui bawk che a, Theih loh i ngah viau tur a ni lo. Harsatna leh manganna i tawh changin tawngtai mai duhtawk lovin insangphek la i theih tawp chhuah thin ang che. Mihring theihna a tawp chinah chuan chhûla i awm lai atanga hretu che leh nangmaha awm reng, mahni intumchawp thin Pa Pathian kha auh buai leh ngen chiam ngai lovin a rawn che em em ang tih ringhlel ngai suh ang che. Chungleng Savate hian buh tuh lovin ât hek lo mah se la, a châwmtu kan Pathian hian thuthluang chunga an ei turin an bu zawlah a va chhawp sak lo tih hre reng ang che. Engpawh ti dawn la, tha thawh a ngai.

            Incheina : In chhungkaw khawsak milin inchei thin ang che. I neih tawk i zahpuina hmunah chuan kal lo mai rawh. Kan Pathian hian a tuamtu kawr ai chuan chhung lam a ngai pawimawh zawk. Bible pawh hi a chhung thu aiin a kâwm hi pawimawh zawk chu ni se, a kâwm hi rangkachak leh lunghluin an chei ang. Zahawmna hi incheina atanga tehtu chuan a teh fuh ngai lovang. An nun leh an thil tihin zahawmna a phurh chhuah zawh loh avanga incheina hmanga intih zahawm tum thin ho ang hian inchei ve ngai suh ang che. Zahawmna chu kan nun dan zawk hi a ni.

Lal hna thawk rawh : Hringnunah hian lungngaih chang te, mangan chang te, hreawm tih changte i la nei dawn, chumi hunah chuan Vanram kâwrah hmangin bihruksan chîng suh ang che. Harsatnate hi kan hmachhawn tura Pathianin min pek a ni. Kan dam chhung la la hian kan tuh rah kan seng thin tih hria la, chi tha i tuh chuan he lei hian rah tha a chhuah ang che. Thih hnu khawvelah chauh a rah lawh i tum a nih chuan i chi theh a tiak ngai lovang. Kan

 Pathian hian he leiah hian tihtur neia hnathawk turin min dah a ni tih hria la, hâw châk viau suh ang che. I tih tura a tuk che tih zawh hman loh mawlh hlau zawk ang che. Ngaihtuah teh. I fapa / fanu kha ram lamah hnathawk turin tir liam la, rei loteah, “Kapa, ka ning tawh, a hreawm, i hnen thlen hlan ka nghakhlel, ka lo haw tawh mai dawn” ti chhen mai se la, i lawm vak lo mai thei. He thu hi i man fuh chuan kan khawhar hla tam tak hi chu i sa tui bik miah lovang. Nang chu he khawvela Lal hna thawk tura Pathianin a dah che i ni si a, vanrama hahchawlh leh hahdam, nawmchen ringawt thlahlel ngai suh ang che