Barhluih kristian-na

Kristianna hi enge a nih chiah I ngaihtuah ngai em?. A awlsam zawng chuan Krista zuitu tihna mai a ni. Ka thalaipui duhtakte u, engvanga Kristian lo ni ngawt nge I nih I ngaihtuah ngai em?. I nu leh pa leh I chhûngte Kristian an nih avangin, Kristian chhungkuaa piang leh sei lian I nih vâng maia Kristian I ni em?.

Sakhaw dang, duhthlan tur dang awm miah lovin, I duh emaw duh lo emaw I sei lenna chhungkua leh khawtlangin an barhluih vang mai che a Kristian em ni I nih?. Thlang-kawr-vai zingah, Hindu chhungkuaah, Hindu Society-a piang leh sei lian ni ta la, Kristian I ni tho ang em?.

A nih loh leh khawchhak lamah Buddhist chhungkuaah piang ta la Kristian I ni tho ang em?. Chhhia leh tha I hriat hma atangin Kristian thurin leh Isua chanchina chawm len I ni a, sakhaw dang hi a dik leh dik loh pawh I ngaihtuah chhin ngai reng reng lo. Naupangchhia mai I la ni a, a âwm tho e. Mahse, tunah chuan Pathian leh khawvel ngaihah mahnia chhia leh tha hriatna hmang thei Puitling I lo ni ve ta. Engtin nge ni ta ang le?. Nangma chhia leh tha hriatna thiang hmanga I duhthlanna kha hmang lovin I naupan lai atanga barhluih Kristianna kha em ni I la chhawm zel dawn?.

Mahni chhia leh tha hriatna leh ngaihtuahna, thinlung chhungril ber atanga duhthlanna tak tak hmang lo leh duhthlan tur dang neih loh vanga kan beng maia kan lo hriat thin, kan naupan tet atanga barhluih Kristianna chhawm chho mai mai kan tam vang hi em ni ang mizo Kristian-te hi kan ngheh loh em em?. Mission Compound-a piang leh seilian, Kohhran Sikul chhuak, Kan Synod puipate leh kan Pastor Senior ten an rinthu mai ni lova, William Barclaya-te hrilhfiahna atanga an chawm sei len, KTP Bêl-ah sam khuih pial thân khawpa chhum hmin pawh kan ni mai thei. A nih loh leh, MHIP Committee kohna leh KTP Branch Committee kohna dawng kawp thei khawpa nula fel leh dam rei pawh kan ni mai thei.

Mahse ka’n ti teh ang. Joba ang khan “Benga hriatna mai zawngin ka hre tawh che a, mahse tunah zawng ka hmu ta che. Chuvang tak chuan ka inten a, vut leh vaivuta thuin ka sim ta e”. tih ngai kan lo ni ve reng lo maw?. Fel leh ti tha ve thawkhata kan inhriatna lai tak hi a ni sim tura min duh. Timothea hi Bible-ah a pianthar dan chiangtaka an ziah lan loh vang maiin, Naupan lai atanga sual lian tham khawih lo leh mahni mihring that thata tha chho ve mai-ho hian Timothea-te huanga inkhung mai an ching thin. Mahse ka hrilh a che.

Nang zawng, I thinlung pindan chhungril berah lut la, I chhia leh tha hriatna thiang hmanga duhthlanna dik tak nen, Kristianna hi enge anih chiah a, Krista zuitu tak tak nihna hi engchiah hi nge a nih tih ngaihtuah chungin Pathian hnenah inhlan thar rawh le.