1980 bawr vela piangte kha tute nge kan nih?

Black and White TV en pha, khawnvartui pawl hma leh nawalh bawk sen hmaa C-Rice ei hman, Cable TV, Internet leh tunlai IT lama hmasawnna hian thopazuana zuan a tum laia a insangphek velin a nek thluk. Tlu chunga thei leh thei lova a mei hmawra chaih ve hman si - Kum 1980 bawr vela Aizawl veng hmawr deuha piang leh sei liante hian eng chiah nge kan lo tawn ve a, engtinnge hun kan lo hman ve thin tih hi zêp lovin ka’n zep ve leh mai mai ang e.

Rual u deuhte chuan an naupan lai chanchin leh an hun hman thin dan hlimawmzia te, an lunglen thu leh nunhlui an ngaihziate an ziak kur ngei nguai thin. A ni tak a, mitin hian kan naupan lai huna kan thil tawn leh kan hun hman dante han chhuikir chang hi chuan nunhlui ngaih leh lunglen, he khawvela awm ve ta lote avanga khawharna thlarau hian min manin nunhlui ramah min thlawhkir pui vawn vawn thin zawng a nih hi.              

A hnuhnung ber kan ni

Fate school bag, patling nileng hlawhin a lei phâk tak meuh loh hnu leh kan faten iptepui pawh an hriat tawh loh hnu hian, keini kha Ipte thui chawp koki atanga khel bawr thlenga a paivat zawnga uai thla zar thin ngei mai kha school kalna a ak hnuhnung ber kan ni mai awm mang e.. ka ti thin. Ruah do haw a ngaih chang leh tute emaw hlauh vanga hmanhmawh taka tlan haw a ngaih chang kha chuan kan iptein min tihbuai loh nan ipte kha hnung lamah dahin a hrui kha zak hnuai tangin tukhum lamah kan kan la let a, tunlai Rack sack/Back pack ang deuh hian kan ak a, banrekah Silipar kan bun sauh sauh hniak pherh vungin kan tlan thin. Kan upa ber hian high School a kal tan kumah ‘Green Bag’a nei a, ka van awt thin tak.  Khatiang Ipte thui chawp kha a ak hnuhnung ber kan nih loh pawhin kan tu leh fate bulah Zan College nuam kan tih thinzia leh P.U. kan zir lai chuan... ti thei hnuhnung ber pawl chu kan ni chiang mai.

Krismas Bawng thlah leh hnah lak te kha a van nuam thei tak. Veng thenawmte nen mual khata bawng kan thlah fuh changte khan Kawl bawng chhawr fe vek tawh insik nachang pawh hre mang lo kha insik tir talh kan tum a. Ruai theh dawnah fatu hovin bawng thlah leh hnah late tan hlui hran midang aia danglam chuang miah lo min buatsaih sak a, kan lawm ve em em a. Thlangra leh hnah kan hnawl a, thleng kan hmanga, chu pawh chu duh tawh lovin a aia awlsam Disposable kan tih leh tawh hnu hian keini kha krismas bawng thlah leh hnah la hnuhnung pawl kan ni mai awm mang e.. ka ti thin, kan nih chiah loh pawhin Saphing ham puara Krismas thlenin tuala inkhel khu rum rum thin hi ka hmu ngai ta lo.

Kan faten TV leh Computer games ringawt an buaipui tak hnu hian, keini rual kha Pawisa thir nawi hmanga in ‘Boli’ thin leh tual chara in ‘Marble’ thinah chuan a hnuhnung ber pawl kan nih ka ring. Motor Ball Bearing hmangin Tawlailir kan siam a, veng sang lamah kan inzui chho dam dam thin. Puitling intih ve tawh hnu leh rual kan pawl zau ve fe tawh hnua han sawi khawm nikhua pawh hian veng inthenawm naupang leh rawltharte hi kan lo inngeih duh vak lo hi a lo nia. Ral atangin kan in au ela, lai leh laiah intawk ang kan han ti ngei a, ram ri-ah a incho tawk pahnih khat an han insual a, a tawpah chuan Sairawkherha indo khan a zui deuh ngei ngei. Keini hnu lamah hi chuan sairawkherh hmanga veng leh veng indo duh pawh an awm tawh lo.

Tunlai thangtharte hi chuan Tape cassette leh Pencil inlaichinna pawh an hre tawh lo, Cassette reel inherh siam buaithlakzia te leh reel chat zawm nan Nail Polish thatzia te kha sawi sawi mah ila an nui mai a. Walkman Battery down tawh kan seh sawih nasat theihzia te, Internet atanga download mai tur awm hmaa sap hla thu kan lakchhawn sual nasat theihzia te kha a hun lai chuan nuihzatthlak miah lo mahse tunah zawng ngaihtuah chhuah chang apiangin ka nui leh vur vur thin. Keini ho kha Cassette rewind leh forward nana Pencil hmang hnuhnung ber kan ni ta.

Lui dunga kan hlim nui ri leh kan ke hniak pherh veng vung thin te kha tawihral hleithei lo Polythene leh hnawmhnawk dangin a chhilh bo zawk tak hnu hi chuan Lui kal nawmzia leh theirah chi hrang hrangte hi Bazar ami lei ai chuan lawh ruk ngei kha a tui zawkzia sawi sawi mah ila, an awih chuang hlei lova. Thian zohava vai thingpui dawr ‘Risk’ leh vai chhang zuar ti buai peih pawh an awm tawh lo a nih hi. Tihtur nei chuang miah lova Town Bus ‘Round’ te kha a van nuam thei tak. Conductor sual deuh tawn fuh chuan min pen ang fawk fawk a. Town Bus a chuang hnuhnung pawl kan nih loh pawn Taxi dum, a chung enga chuang hnuhnung pawl chu kan ni hrim hrim.

A hmasa ber kan ni

Bangladesh TV-a MacGyver leh Osin en tuma ‘A fiah em?’ ti lauh lauh chunga Antena her thin kha Cable TV-in min han run thut mai a, M-TV leh Chanel V tih velin kan incheina, kan Hair Style leh kan khawsak phung, kan nundan thlenga a sawisak hmasak ber kan ni. Keini ho kha Video Game khel hmasa ber kan ni bawk ang. Mortal Kombat, Super Mario, nintendo..te kha tlaivarpui hmasa ber kan ni chiang. Tunlai angin Cheat book te hmuh mai tur la awm ve hek lo, a khelh chu sawi loh, ‘cheat’ zawng ringawt pawhin kan hmet kual zan khua peih. Hmeichhe tennis khel thiam hmingthang Martina Narvatilova hi patil a nih leh nih lova inhnial hmasa pawl kan ni a, Manchester United kawr hmaa sharp tih inziak hmu hmasa pawl kan ni bawk. British Bulldog leh Hitman te hi tang dun se, Undertaker leh Hulk Hogan hi tang dun bawk se a hmuhnawm viau ang ti pawl te pawh kan awm bawk.

Computer room-a kan luh dawn apianga pheikhawk leh Silipar kan phelh thlap thlap hunlai kha la rei lo viau mahse tunah zawng hawina apiangah computer hmuh tur a awm ta. Keini ho hi Windows version hrang hrangte kha a hmang hmasaah kan tang a, Xp thlengin a khawih hmasa ber kan ni. Rual u deuh ten 3.5 flopy, 1.44MB an nawr luh rik khap khap thin laiin kei ni chu Cd leh DVD te kha a hmang hmasa ber kan ni. Xerox hmang hmasatu kan nih thu leh Digital Camera hmanga thla la hmasa kan nih thu te chu sawi lo law law mai ang. Cyclostyle atanga Offset a zuan kaipui tu pawh kei ni bawk.

Internet te hi a taka hmang tangkaitu leh atchilh hmasa ber kan ni. Dial-up conection nena cyber cafe luhchilh hmasa ber kan ni bawk. mIRC hunlai leh kan vanglai a in nang chho te kha kan va nihlawh tak em. Kutzungchal chauh hmanga computer keyboard chuka kan han ‘chat’ chat chat mai thin te kha a lunglenthlak ta hle mai. Zing lam dar hnih velah pawh kan la ‘Hi’... ‘Hello’ ... pap pap mai thin kha a nia, Dalnet, Cyber Army.. tih vel kha kan ti ti tui ber kha a ni miau mai a, kei phei chuan Cyber Army tih kha en lova ka chhut thiam hmasak ber a ni. LoL tih te leh Asl tih te kha a awmzia hriat tumin senior deuh te kan han zawt ru dek dek a, dik chiah lovin min han hrilh ngei mai a. mIRC lamah kan han inkawm tlang nel hmasa phawt a, Yahoo messenger, RediffBol tih velah ‘id’ in dilin kan han in ‘add’ chho vel ta thin kha a nia. Web Cam awmna-a thut fuh tumin chaw ei kham kam pawh thuah tha hman lovin kan tlan chhuak dawr dawr thin.

Keini rual ho kha Mobile phone hmang hmasa leh Sim Card neih tuma zan khuaa intlar peih hmasa ber kan ni bawk. Nokia Handset Black and White atanga Camera leh Mp3 support te hi a hmang hmasa kan ni zel.

A tha lo lamah pawh hmahruaitu kan nihna a tam mai. Ruih nana khuh damdawi  ti lartu leh Proxyvon-a inchiu hmasaber kan ni bawk. Mizo sex video hmuh tur tam ber pawh hi kan rualpui deuh vek an ni. A tha lo lam hi chu sawi a nuam thin lo, chuvangin No-4 lar tak hluai nachhan pawh kha keini bawk tih hian kan thu hi a hmawr i bawk mai teh ang.

A tawp berah chuan, engtik hunah pawh piang la, khawi hmunah pawh seilian la, nuam leh hlimawm kan tehna hi min hualveltu, kan chhehvel leh kan thil neihte ni lovin, damchhung khawsak lungkham buaina leh rual elna khawvelin min bawh beh hma, rilru leh taksaa phuartu leh delhtu awm miah lova ‘Zalen’ kan nih lai, kan naupan lai hi a lo nuamin a lo hlimawm ber zel a lo ni.