German Ral Lian-part one (Inkhel En Thu Nawi)

Khatia German ral lian hmachhawn tura lammual pana kan chhuak ta kha..Thlarau Thianghlim hruaina zarah Aizawl chu tluang takin kan thleng ve hlawl mai a.. Chhungte hneha kan lo Order lawk tawh angin Vawksa rep chhum leh Khanghu Buhchiar hmeha puar el euh a buhchangrum kan bar zawh chuan chhungte pawh mangtha mumal hman lovin Kan tum ram lam panin pul hri tlan san tluka hmanhmawhin kan kawh chhuak leh nghal pawt a.

Luh ruk tum sa-a kal kan nih avangin Gate pui lam pawh kan pan buai duh lo.. Naupan lai atanga kan lo chin than tawh kan kawng tum ruk lama kal tumin Dak Inpui sirah kan liam thla ta nghal a. Kawng chin hre ber ka ni bawk a, in la Boss takin hma ka hruai a, kawng tum leh an in sak dante chu lo ti danglam deuh nual tawh mahse, ka hriat bel tawh em avangin ka buai eih lo. Assam Rifle Lane nu ho hmuh hlau takin, tukverh hnuai lamah Naupan laia kan tih thin dan Ninja style ngei mai khan Pathling pathum, chhungkaw pa ber thah maite chu kan kun phei dan dan a. Nuih a za, nuih chi lah a ni der bawk si lo. Kan nuih rik vaih chuan Assam Rifle nu hovin min vin tuar tuar pahin tui chhia min leih puat a ni mai. ‘Den’ lutuk. Tlangsam buk ro hnuaia vawk kawng rau ang lek kawng tum kan zawh leh zuai hnu chuan Lammual chhim lam zunin bulah kan chhuak ta hlawl a. Vanram kawtchhuah ni mai awma mawiin a lo eng ta pup mai le. khelmual chhuntu engte chuan kan bianga thlantui luang te chu a chhun tle ta ser ser mai. Kekawr ipte hnung lama Ticket man to ber chi pawh bun ak niawm fahrana thawvengin mual zawl lam kan pan phei thauh thauh a.

Lammuala inkhel hmuhnawm deuh a awm apianga Class tlan bopuia ka sawm thin, ‘Englovi’ kha mitthlaah a lo lang zawk a. Chana ro ei paha inngheng riala kan thut dun thinna ‘Tlang’ lamah te chuan ka mit ka han len chho a. Fa engzat nge a neih ve tawh ang aw? Tunah chuan chhangchhe nu a ni ve tawh ngei awm si a.. tih te thlengin ka ngaihtuah hman. ‘Tlang’ lamah chuan lawn chhoh chi rual a ni tawh lo.. mihring hlir an thu khat vek tawh. Chutia ka hawi vual vual lai chuan Thlarau sualin min rawn bei leh ta tlat mai. Ticket man to neiho thutna lamah chuan inzeh ve mai theih ka inring leh ta tlat pek a. Engtin nge Duty ho ka kal pelh ang..? Ka Putea Sipai Uniform hlui kha lo ha chhuak ila chuan ka tlang chiang sa! Thenawm pa Video thlalakna te reuh te kha lo hawh ila, Laptop bag ak chungin inti-Journalist deuhin lo vei ve chhen ila.. (chhunzawm tum..  =D )