Ka Nu Dawt Sawite

Chhungkaw rethei tak atanga piang leh sei lian ka ni a, mi min pek a nih loh chuan thil thar reng reng hi nei turah ka inngai ngai lo. Nikhua ka hriat ve tirh atangin kan rethei tih ka hriatchian avangin ka nu leh pa te chhawk zangkhai ka tum tlat thin.

            Tukkhat chu chaw chhum tur kan nei mumal tlat lo mai a, a mawi tawk chuan kan thleng ah kan khawrh ve takna a, a tu a mah chuan kan puarpui dawn lo tih kan chiang hle. Chumi tum chuan ka nu chuan a chanai min ei tir a, ka lama a thleng rawn nawr phei pah in, “Bawiha ei zawk teh, ka ril a tam tlat lo mai.” Hei hi ka nu dawt sawi ka hriat vawi khatna.

            Ka nu chu a rem rem thawka inhlawhfa thin an ni a, kar tawpah tlai lam sa man tlawm tlemte a rawn khai haw ve thin. Chawlhni tuk khat chu ka nu chuan sa a suak ve miah lo tih ka hria a, hreawm ka ti hle a, sa hrang khat chu ka nu thlengah a ei turin ka va dah ve a. Ka nu chuan, “Bawiha, nangman ei rawh, sa hi ka ngaina teh chiam lo a nia..” tih pahin a dah let leh a.  Ka nu dawt sawi vawi hnihna.

            Sikul kai rual ka ni ve ta. Ka nu chuan ka hmalam hun thlirin sap sikul man tlawm deuhah tal min dah a duh ve si, chhun lama a inhlawhna atang ringawt chuan a tlin dawn lo tih a hrechiang si, zan lama thawh theih chi a dap a tul leh ta. Zankhat chu Panhnah cheh tur leh Kuhva kheh tur a rawn pawm haw teuh mai a, kan kheh dun a, kei chu naupang tih takah ka mut a chhuaka ka mu mai a, ka than harh leh pawh chuan a lo la mu lova, Ka nu mu ve tawh rawh i chau ang ka tih pawh chuan, “Bawiha, nangmah khan lo mu mai teh, kei chu ka mut a chhuak rih tlat lo..” a ti a. Ka nu dawt sawi vawi thumna.

            Kum tawp exam kan zawh ni chuan ka nu chuan pawn ni sensa hnuaiah min lo nghak char char a, rang takin ka tlan chhuak a, ka nu, ka thiam vek tih pahin ka kuah chuk chuk a, ka nu chuan bur chhin nei kan neih ve chhun Lactogen bur hian ka thingpui in tur min lo ken sak a, tui ti takin ka in khawlh khawlh a, ka in zo tep tihah chuan ka nu chhawl hal ve turzia ka ngaihtuah chhuak thut a,  ka nu ka inban ang che tih pahin ka pe a, a kut a lo dan pah chuan. “Bawiha nangman in zo vek rawh, kei chu ka chhawl a hal ve love..” Hei hi Ka nu dawt sawi vawi li na chiah.

            A rem rem zuar kual chunga Pawl sawm ka pass hnuin ka pate-a te khuaah Private High School pakhata Chawkidar hna thawk turin ka kalsan a, ka hlawh lak hmasak ber tumin ka hlawh zahve lai mai ka thawn a, a lo let leh rang kher mai, pawisa karah chuan lehkha them a rawn zep tel a. “Bawiha, Tlangval i nih ve dawn tawh kha, kei aiin i mamawh zawk ang, kei chu pawisa hmanna tur pawh ka hre ve love...”  Ka nu chuan a vawinga nan dawt a sawi leh ta.

            Inhlawhfa chunga zir chho ve zelin tun hun hi ka thleng a, khawsak phung pangngai deuha ka khawsak ve theih hnu chuan, ka nu chu ka awmna lama hruai ve ka duh ta a, kawng tinrenga ka thlem hnuah pawh, inthlahrung reng renga a dam lai hmang zo tu ka nu chuan, “Bawiha, In tha leh nuam taka chen hi ka chak zawng a ni ve lo, thiam pawh ka thiam ve lovang...” tiin a hnar tlat a.  A vawi rukna.

            Tar a lamah ka nu chuan Cancer a vei ta tlat mai, ka hriat ve leh chawlh pawh tifel hmasa lovin ka nu awmna chu ka pan nghal vang vang a. Damdawiin khumah chuan a lo mu bam a, Ka nu cher tawh zia leh a taksa chhiat zia ka hmuh chuan ka insum zo ngang lova, ka nu hmuh hlau tak chungin ka mittui ka hru fap fap a, ka nu chuan min lo hmu reng mai. “Bawiha tap mah ta che, ka chau deuh satliah mai a lawm, na pawh ka nei hlei nem...” .  Dawt a sawi leh ta. A vawi sarih-na chiah a ni.

            Tunah chuan dawt sawi ngaih tawh lohna hmun Lal nunnema kiangah thlamuangtakin a chawl ta. Kanu, ka va’n ngai tak che em!!