Bawihte

Kan inneih champha a lo thleng leh dawn ta. Ka nupui duhtak, hei hi i pual liau liau a ni e.

------------------------------------------------------------------------------------

Duat taka ka chul thin i kut no nalh tak hi;

Engtik niah emaw chuan chuarin a la zûr ang a,

Midang tana mawina hnutchhiah hauh lovin a la vuai dawn,

Chutih hunah chuan; kei chuan,

I kut vuanin 'Bawihte' ka ti fan ang.

Duat taka ka chul thin i sam nung nalh tak hi;

Engtik niah emaw chuan tuakin a la til ang a,

Midang tana mawina hnutchhiah hauh lovin a la var dawn,

Chutih hunah chuan; keichuan,

I lu chûlin 'Bawihte' ka ti fan ang.

Duat taka ka melh thin i mit meng mawi tak hi;

Engtik niah emaw chuan chuaiin a la chul ang a,

Midang tana mawina hnutchhiah hauh lovin a la vai dawn,

Chutih hunah chuan; kei chuan,

I mitah enin 'Bawihte' ka ti fan ang.

Kum sul vei in, hmanlai kan chang dawn;

Midang tana 'Tar chhia' mai i nih hun leh,

Mi zawng zawngin 'Kapi' an tih hun che a la thleng dawn,

Chutih hunah chuan; kei chuan,

I biang nûlin 'Bawihte' ka ti fan ang.