Nuthlawi Zun

Up leh thup tuma rei tak ka lo hup tawh, An sawi an sel leh an sâwtna tawngkam chhe tinrengin bang lova min buak bawrh bawrh chung pawha sairil hnang ang maia ka lairil phuar tlat tu- Phuloh Tha hmingliani, ui tak chunga ka chân tak chanchin hi zêp lovin ka rawn zep ve leh mai mai ang e.

            A tleirawl chhuah tirh atanga siphnip thana thang, a uar deuh te phei chuan Tlâng sum ti hiala an sawi duh kha a ni a. Kan Lal Isua khan Jakoba tuichhunchhuah bulah khan han hmu ve se la chuan, “Pasal pahnih I nei tawh, tun a mi hi I pasal tak a ni lo reng a ni..” a tih ve mai tur chi kha a ni reng lah tak a. Mahse han en mai chuan pawisawi lo leh kimki cheih cheih awm tak hi a ni reuh a, a hmel te lah kha ti sen nei mang lo, Changkha lei dep kan tih ang chi, len deng ke thiah an sawi ang mai a dang var pap mai, mit meng lian leh chiang kak mai, “A pu hi vai a nia..” pawh ti se, “Ka ring reng a..” tih tur chi, nuthlawi sa pan leh fu ke zen thlarh mai a nih vang te pawh kha a ni fa hmiang, ka fin vangah ngai lui tlat mah ila, min lo bual â hneh hle zawng alo nih dawn kha. Thian thate thurawn pawh ngaithla duh lovin, tawnhriat leh daihriat neih belh tumin hmangaihna hmaithinghawng vuah chunga hurna thlarau paipawn tel in, phuahchawp hmangaihna tuipui chu khup thleng chauha dai tumin ka lut lui ta kha a ni a.

            A lo mak thei ngei mai.. A tak rama han luhchilh takah chuan, Pawn lam atanga kan lo ngaih ang a ni ta hauh lo mai le. A nihna leh a tlin lohna a hriat chian avanga zawr hnep mai, mi dang pawi sawi hlau ngawih ngawih, a ma dikna ngeiah pawh ‘ka thiam loh a ni’ ti thei khawp a tlawmna nun nei mi, nu in ngaitlawm em em mai hi a lo ni reuh a. Tuisik lo deuh han lem ve chang a, thlarau thianghlim vak lo in min pawl fuh tum phei chuan, mit siai meuh in kan en vang vang a, ‘Isua nu mari kha a ni thei mai ang a.. te ka tia…, a tih fuh tum chuan rei vak lo chhung chu min chhandam ve theih mai te ka ring rum rum thin.

Phuahchawp hmangaihna tuipui ah, ka lemchan na thuam nena lut kha ka ni nang in, ka tum dan a ni ta lo tawp mai. Kan nuthlawii chuan ka tai ah hlingin a duh na lam lamah min kai tan ta tlat mai le. Khup thleng chauh emaw ka tih laiin kawng thleng in ka lo inchiah hman a, ka kawng a thleng tih ka hriat chuan âwm, âwm thlenga daia ka in ngaih laiin a hleuh a hleuh turin min ti ta si.. A mal chunga sei liana a khumpui ka kai tak hnu phei chuan ka nu leh pa te chuan Fapa an nei ta lo.

Nu leh pa ten ‘Fapa’ ti a an lo chhal ve thin, hmathlir thui tak an lo neih pui ve thin chu chu tia nuthlawi kap kara phum bova a han awm mai tur chu ngai ngam lovin thlan kotlang tan chhana in ham tan tumin theih tawp chhuah ve thin mah ila, chak lohna in a phuar vel he mihring awngrawp tak hian a thei mawlh si lo.  Ka nu duhtak chuan chhung khat leh thian tha te phung bawmah sawmin vawi duai lo min kaih chhuah tum thin mah se, ka tai a min hling tu chuan ka chak lohna a hriatchian em avangin, zu leh sa tawktarh a hmangin a malpui pahnih inkarah chuan min chep bet hneh em mai a, tu han pawh chhuah theih zia zang ka ni lo.

Lungngaihna chirh dup atanga in hai chhuah tuma kan phek buai lai chuan kan nuthlawii lah chuan berh ve hlek lovin vaukam min kai san a, vaukam lungpui chunga thuin min chhiatkhum duh lek fang a ni ta si a..

Tukhum chhah chhawna min liam san hnuah pawh thlan khur thlenga um zui tuma ka puan ven ka sawi chhin sauh sauh dan leh chu mi hreng a ta ka chhuah tak dan, I’m a survivor ti a hnehna hla do ka chham khum leh theih tak dan a chhun zawm leh tum a ni.

Hmangaihzuali

Nupui fanau mut rehah pawnah Chair la chhuakin ka thu a, chunglam ka thlir a, Arsite chu an phe neuh neuh a.
Engtia rei nge ka thut tawh ka hre lova, engvanga pawn khaw vawta thu ta reng nge ka nih ka hre hek lo. Ka hriat chhun chu ‘Zan hi a ral lek lek tawh a, khua a var har tawh vak lovang’ tih chauh a ni. Zaninah hian tunge ka nih chiah pawh ka chiang ngam lo. Hei erawh ka chiang – Zaninah hian kum tam tak liam ta a Sialsuk khaw tleirawl Hmangaihzuali ta ka ni. Ni e, a piancham a lo thlen dawn hi chuan ka he ti ziah.

Thla eng hual vela chhum pan te te zam chiaiah chuan a nui hmel ka hmu a, huihchhuk thli rawn thaw heuh heuhah te chuan a rimtui hman thin rim ngei mai kha a rawn nam nawn leh a.

Nunhlui ngai leh lunglenna thlarau chuan min tham kang lawp lawp a, nunhlui ramah min thlawh kir puiin Mission vengthlanga mi inhnuai chep thim rik rekah khan min thlawh luhpui leh ta.

Kha tleirawl te kha a hmel thatzia sawi ka tum lo, tum mah ila vantirhkoh tawng tea kan sawi thiam a nih ngawt loh chuan, mihring tawng hian a puangchhuak zo dawn chuang lo. Sawi a fiah chi a ni lova, sawi loh lahin a chiang chuang der lo. Hmeltha reuh tak a ni tih hi ka sawi thiam dan ber a ni mai.
 A u te khan zirna sang zawk zuanin Aizawl veng mawng lam, in luah man tlawm deuh tur an rawn zawng a, kha inhnuai chep zet maiah khan an rawn inkulh a nih kha. Kan nauvi chu sikul chawlh denchhenin a u te pui turin a lo phei ve hi a lo nia, chutia ka nghawng lenna rama khawdang sial lo tla lut ta chuan keia rawlthar hmangaihna pal chu a rawn nek puar ta pawp pawp mai. A u te in lah ka len luh ve fona a ni sia, a va han chak dawn lo rua em….

“Hmeichhia chu an inring lo lai hi fawp thut i la, kan inngaizawng a ni nghal mai” tih kha kan rual u deuhte leh kan Boss te hnen atanga thu rochhiah kan dawn kha a ni miau mai a, a lo thlen zanah a u te nena kan thingpui inna no a sil rak rak lai chu tui in chhuanlamin ka veh phei them them a, a biangah kan fawp thut mai a leh. Kha tih lai a a hmel kha ka thinlungah hian banga thlalak tar ang maiin a la fiah nia..

kan U te thu ro min chhiah kha a lo dik thui fu a ni ang, ‘Sikri’ ai in kan thu bial pap a, kan kut kan ti pharh sang mai bawk a, enge maw changa kan kut a insik hlek pawh khan a ‘Tek’ ta chuai chuai mai. ‘Kan hlim dun ta em em a’ tih hian kha tih laia kan awmdan kha chu khaikhawm mai teh se. Aizawla cham reng thei ni hek lo a haw a lo hun a, a haw dawn zan kha kan va huphurh teh lul em!

A liam fel ta maw tihah lehkhathawn ka han ziak tan nghal mai te kha tun hnua ka ngaihtuah leh hian ka nui vur vur thin.
Sialsuk Bus Conductor ipte bal zet maia dah mai tur ni si kha uluk em emin ka thlep a, ka u nula in a roh em em a Rimtui khan a hriat hlau zetin ka’n phuh zauh a…. Sialsuk Bus haw tur nang hman ngei turin ngaizelah ka chho nitin thin. Hmangaihna thu ril leh thlum tin reng mai, JF-a love letter chen zeta thui te, Ka ngai lutuk che tih ringawt te, tuman an hriat thiam ve loh tur ni leh thla (Date) ringawt inziak te… kha Bus hrawl pui mai khan a sawh phei pui boh boh thin..

Ni a liam a, thla a vei a, kumpui hial a let ta. Boruakah hmangaihna in sang sa a, hlim tawp hlau lova kan len lai chuan, Eden bawhchhiatnain a hrin chuah thikna avangin, kan hlim duh lotu ten kan inhmangaihna chu a zung chawpa kar phawh vek tuma hriam lekin kan sahuatah tak min chhun ta. Na ve ngaih ngaih tak a ni.

A pa in uluk taka min Counselling zawh chuan ka rilru ka siam fel a, Thutlukna ka siam tawh zawng zawnga ka la inchhir ber mai chu ka ti fel ta. Rawlthar thisen lum lai leh hnutiang hmatiangin min la tih buai hma a ni bawk a, Mahni tawk a hmu zo in tih ve nak a laia mi phal lo chung te chu ka va han ngaizawng awm hlei lo em….ka ti ta a ni.

‘A sawp chu na tak a ni’ tih ang mai khan thlan khur thlen hma loh chu min um zui reng tawh dawn tih reng ka dawn pha lo. Zu hmun sa hmunah, nulat tlangval kawngah leh ruihhlo chi hrang hrang zingah Sialsuk khaw tleirawl thlak tu tur ka han zawng ta a, tumah rengin a ai an awh zo si lo….
Chuan leh.. rilru a in let but a, ka hmangaihber ka neih theih tak si lovah chuan, min hmangaihtu ber ni a ka hriat chu nupui atan ka sawm a, he ti hi kan lo ni ta.

Le, ka mualpho thui hmain a hmawr bawk mai teh ang.
Hmangaihzual, I piancham a lo thlen dawn zan hian tih at-in ka la awm ziah tih leh Kan inthen dawn zana ka sawi “Ka hmangaih ber i ni a, eng lai pawhin ka hmangaih reng ang che” ka tih kha ka din na a la ni reng.. Ka hmangaih che..

Barhluih kristian-na

Kristianna hi enge a nih chiah I ngaihtuah ngai em?. A awlsam zawng chuan Krista zuitu tihna mai a ni. Ka thalaipui duhtakte u, engvanga Kristian lo ni ngawt nge I nih I ngaihtuah ngai em?. I nu leh pa leh I chhûngte Kristian an nih avangin, Kristian chhungkuaa piang leh sei lian I nih vâng maia Kristian I ni em?.

Sakhaw dang, duhthlan tur dang awm miah lovin, I duh emaw duh lo emaw I sei lenna chhungkua leh khawtlangin an barhluih vang mai che a Kristian em ni I nih?. Thlang-kawr-vai zingah, Hindu chhungkuaah, Hindu Society-a piang leh sei lian ni ta la, Kristian I ni tho ang em?.