Davida leh Goliatha

Davida leh Goliatha

Tlangau : (Khuangpui - Dumm..Dumm..Dumm..) Lal ber Saula thuchhuak lo ngaithla theuh rawh u. (2)

Judai ram chhunga Soko khuaah Philistia mite min do turin an pung khawm chiam mai a, an mahni lo bei let turin Israel mi ral do thei chin chu chhuah khawm vek tur a ni e. (Dumm..Dumm..Dumm..)

Jesaia In-1

Jesaia : Ekhai, Ka fapa te u, ka bulah hian lo kal khawm teh u khai.

Fapa : Kapa, Enge ni ta?

Jesaia : Kha Tlangau kha in lo hre vek ang a, Philistia ho min do turin an pungkhawm chiam mai a, an mahni lo bei let turin nangni ho hi in chhuah ve a ngai dawn a ni. Nang, Eliaba..Nang, Abinadaba.. nang pawh Sama.. Kan Lal Saula hnung zuiin ral do tur chuan in kal dawn nia, Jesaia Fapate in ni tih kha hre reng ula, huaisen takin ral chu in va bei dawn nia.

Fapa : Kapa, kan kal nghal mai dawn em ni ang?

Jesaia : Aw le.. in siam ula, kal nghal mai rawh u.

Fapa : A nih leh, Kapa, kan kal nghal mai a ni aw.. Jesaia : Aw le.. Huaisen takin in va awm dawn nia.. Kei pawh in tan Pathian hnena inthawina tur halral thil hlan ka va buaipui ang e.

Battle Field-1

Stage leh lamah Goliatha a lo langa, leh lamah Israel sipai (hlauh hmel takin)an awm bawk a.

Goliatha : Israel sipai, Saula chhiahhlawh ho khan hei hi lo ngaithla rawh u. Vawinah hian Israel sipaiho te u cho chikimin ka cho che u a ni. Haha ha ha.. Ka sawi chu in hria em? Mi pakhat chu in thlang chhuak rawh u le, kan lo in bei ang e. Ha ha ha.. Israel sipai mi dawihzep ho tuman min bei ngam nange.. mipakhat chu lo thlangchhuak ula, naktukah ka lo kal leh ang.. in hria em..hahaha..

Sipai 1 : A va lian rapthlak em em ve le, a hmel te kha a rapthlak lutuk, a chak hmel bawk si, ka hlauh zawng tak a ni.

Hmeichhia 1 : Awi awi awi... a va rapthlak ngai ve le.. Hei ei leh in tur kan rawn ken sak che u, in hahin in chau tawh awm sia, la ula ei rawh u.

Sipai 2 : A va lawmawm em em ve, kan chauin kan ril pawh a tam tawh khawp a sin, in fel hle mai.

Hmeichhia 2 : Kei zawng Philistia mi lian pa kha ka hlau em mai, a lo lang leh ang tih ka hlau a nia, hawh u, in riah buk lamah i kir leh phawt mai ang u, tah chuan eitur te hi chu in ei mai dawn nia.

Sipai 3: Ni e, a lo lan leh hmain riahhmun lam pan phawt mai ang u, a hlauhawm em mai, kan cho rual a ni lo a nih kha.

Jesaia In-2

Jesaia : Ka fapate chu ka ngaihtuah hle mai.. indonaah an la kal ngai si lova, engtinnge an chanchin ka hriat theih ang aw.. Davida ka bulah hian lo kal hnai teh khai.

Davida : enge ni ta kapa..

Jesaia : Lal Saula leh Israel sipaiho awmkhawmna hmun Ela ruamah va kal thuai teh khai, hei, eitur chi hrang hrang leh chhang hlawm sawm hi keng la, i u te i pe dawn nia, chuan, hei Bawnghnute khal tlang sawm hi keng bawk la, Israel sipai hotu i pe dawn nia, i u te leh indona chanchin kimchang takin i rawn hre dawn nia.

Davida : Aw le, kapa, naktuk khawvar veleh ka kal dawn nia, chanchin kimchang ka rawn hawn dawn nia.

Jesaia : Ni e, zing takah i tho dawn nia, ti rawh i mu phawt ang khai.

Battle Field-2

Stage leh lamah Goliatha a lo langa, leh lamah Israel sipai (hlauh hmel takin)an awm bawk a.

Goliatha : Israel sipai dawihzep ho.. hei ka lo lang leh ta e. ka sawi kha in la hre reng em? Mi pakhat in thlang chhuak ula, lo kal rawh se, chumi chuan min bei ngam a, min tihhlum thei a nih chuan kan vaiin in chhiahhlawhah kan awm ang a, amaherawhchu keiin ka ngam zawk a, ka lo tithlum a nih chuan kan chhiahhlawhah in awm ang a, kan rawng in bawl ve thung ang.. chu chu in ngam em?

Davida : He serh tan loh Philistia mi hi tunge maw a nih a, Pathian nung sipaite a han cho vel chu le? A va han chapo em em ve, bei ngam in awm lo a mi? Pathian nung sipaite han cho ngam chu tihhlum daih tlak a ni.

Eliaba : Ehe he.. Davida, he lai thleng thlengin enge i rawn tih ve haw leh rang rawh, naupang awm ve na chia nih loh hi, khawiah nge i beram ven te pawh an awm, i rawn kalsan ringawt ni maw.. haw hmanhmawh rawh.

Davida : Ka u , kapan min tira ka lo kal a nih hi. He serh tan loh Philistia mi hi tunge maw a nih a, Pathian nung sipaite a han cho vel chu le? A va han chapo em em ve, bei ngam in awm lo a mi?

Sama : Kha khai khai... nangte hi i zahphiawm reuh lutuk, nang naupang mai mai khan engmah lo sawi ve suh..mi dangin an hre palh reu reu ang e.. sipai dangin an hriat chuan a zahthlak dawn em mai.. riahbuk lamah kir pui vat i ngai a nih hi... kal rawh.. kal rawh.. zahpuiawm reuh lutuk mai..

Goliatha : Ha ha ha.. Israel sipai mi dawihzep ho tuman min bei ngam nange.. mipakhat chu lo thlangchhuak ula, naktukah ka lo kal leh ang.. in hria em..hahaha..

Lal Saula In

Lalthuthlengah thuin hmeichhe pahnihin an zap a, a bulah a fanu a thu bawk a.

Saula : Ka mite zingah Philistia mi lian Goliatha bei ngam tur leh hneh thei tur tumah an awm lo maw.. engtinnge ka han tih ang aw.. e, tih dan tur ka hria ta, ka sipaite tih phur nan leh an lo huaisen zawk theih nan he ti hian ti teh ang. He Philistia mi lian, Goliatha bei ngam leh tihlum thei tu chu sum leh pai tam tak ka pe ang a, ka fanu hmeltha tak mai hi nupui atan an nei bawk ang.. tin, an thlahte zawng zawngin Lal hnena chhiah an chawi a ngai tawh lo bawk ang... umm... tha dawn lutuk.. tha dawn lutuk.. chutiang tur chuan ka sipai te hnenah thu thlen nghal a ngai a nih chu.

Davida : Aw Lalber, Jesaia fapa Davida ka ni a. Lal ber, Philistia mi lian avang chuan i rilru zam reng reng suh se, kei i chhiahhlawh tlawm tak hian chu Philistia mi liana chu ka bei ang e.

Saula : Ekhai, tlangval, nang zawng Philistia mi lian bei tur chuan i kal thei em lovang, i la naupang lulai em mai, A ni chu a tleirawl tirh atangin ral do mi ni tura buatsaih a ni a sin.

Davida : Lal ber, i chhiahhlawh hian kapa beram ka veng thin a, sakeibaknei emaw savawm emaw an lo kala ka beram te an seh pawhin ka um a, ka bei a, ka chhanchhuak thin a sin. Tin, keimah min seh an tum pawhin ka theih tawpin ka bei a, ka tihlum thin a ni. I chhiahhlawh hian sakeibaknei leh savawm pawh ka that ve ve tawh a sin, Philistia mi lian Goliatha pawh chu ka tihlum thei ngei ang. Pathian nung sipaite a cho veia, sakeibaknei leh savawm laka min chhanchhuaktu chuan he Philistia mi kut atang pawh hian min chhanchhuak em em ang.

Saula :  a nih leh le.. i beih ngam chuan keini han dan chi pawh i nih loh chu. Lalpa Pathian chuan a tanpui ngei che ka beisei e. khai le.. Ka ral beihna thuam, thir kawr leh ka khandaihte khan han thuam rawh u le.

Davida : Lalber, hetiang hian ka la inthuam chhin ngai si lova, ka kal pui thei hauh lo mai, he tiang ai chuan ka beram ven thuam nen hian ka bei zawk ang e.

Saula ; A nih chuan hlip leh mai rawh u. A nih leh Tlangval kal rawh le, keini pawhin i hnungah kan rawn zui ang che. Lalpa i Pathian chuan vengin awmpui zel che rawh se.

Battle Field-3

Goliatha : Israel mite u, ka sawi kha in la hre reng em Tunge min bei tur chuan lo kal dawn le.. ka lo nghak e.hahaha..

Uai... nang hi maw min bei tura lo thawk chhuak chu... Naupang te, ui emaw ka nih i tia law? kha tia tiang nen chauha i lo kal, i va huai awm reuh ve..hahaha.. Lo kal hnai teh, ka lo pawt sawm vek teh ang che.

Davida : I taksa kha chungleng savate leh ramsate ei turin ka pe dawn a nia, nang chuan khandaih te, fei te kengini lo thawk a, kei zawng sipai ho te Lalpa, Israel te Pathian i cho a hming ngei in a ni ka lo kal ni. Vawiinah hian nang hi Lalpan ka kutah min pe dawn a ni. Ka that che anga i lu ka tan bawk dawn a ni, chutichuan khawvela mi zawng zawng hian Israelte zingah hian Pathian a awm a ni tih an hriat theih nan. In dona chu Lalpa indona a ni si a, Lalpa chuan nangni ho hi ka kutah min pe dawn a ni.

Virvawm a lachhuak a, Goliatha chu a chaldarah tak a vawm a, Goliatha chu a tlu ta a.

Davida : Indona chu Lalpa indona a ni a, Hnehna chu Lalpa ta a ni, Lapa chu fakin awm rawh se..

Sipai ho : Indona chu Lalpa indona a ni a, Hnehna chu Lalpa ta a ni, Lapa chu fakin awm rawh se..

Davida chuan Goliatha Khandaih chu a la a, a lu a tan ta a. Goliatha lu khai chungin mipui lamah a kal hnai a.

Davida : KTP member duh tak te u, Tunlai khawvel sualna chi hrang hrang min beitu leh min dotute hi lianin hneh harsa thin hle mahse Pathian kan lama a tan tlat avangin kan la hneh ngei dawn a ni, zam lo leh beidawng mai lovin i bei zel ang u. Indona chu Lalpa indona a ni a, hnehna chu Lalpa ta a ni.

Kan lawm e.. 

April 15-2013